ប៉ៃលិន៖ អភិបាលខេត្តប៉ៃលិន លោកស្រី បាន ស្រីមុំ ចុះបញ្ជាកម្លាំងហាមឃាត់គ្រឿងចក្រដែលបានជីកកកាយដីចំណីភ្នំនៅចំណុចភូមិផ្សារព្រំជើង ឃុំស្ទឹងកាច់ ស្រុកសាលាក្រៅ កាលពីថ្ងៃព្រហស្បតិ៍ ទី១៦ ខែមិថុនា ម្សិលមិញ ក្រោយពិនិត្យឃើញសកម្មភាពមិនប្រក្រតីជាច្រើនកំពុងតើឡើងនៅតំបន់ដីព្រៃភ្នំធម្មជាតិ។

ក្នុងរយៈពេលមួយសប្ដាហ៍នេះរដ្ឋបាលខេត្តប៉ៃលិនបានចុះហាមឃាត់ជាបន្តបន្ទាប់នូវសកម្មភាពជីកកកាយដីភ្នំ ដែលតាមការសង្កេតគឺជនខិលខូចទាំងនោះធ្វើការរុករានដីព្រៃពិសេសគឺភ្នំដើម្បីឲ្យភ្នំទាំងនោះក្លាយជាដីទួលឬដំបូករួចឃុបឃិតជាមួយមន្ត្រីសុរិយោដីចេញប្លង់កម្មសិទ្ធឯកជនដែលធ្វើឲ្យដីព្រៃនិងភ្នំជាធនធានត្រូវបាត់បង់មួយថ្ងៃបន្តិតៗស្ទើរតែអស់ទាំងស្រុងទៅហើយ។

ដោយឃើញសកម្មភាពនេះ អភិបាលខេត្តលោកស្រី បាន ស្រីមុំ បានប្រកាសព្រមានថាបើពួកគេមិនបញ្ឈប់សកម្មភាពរំលោភបំពានដីចំណីភ្នំនិងដីព្រៃឈើដែលជាកម្មសិទ្ធិរដ្ឋបើទេរដ្ឋបាលខេត្តនឹងចាប់ផ្ដើមអនុវត្តន៍វិធានការច្បាប់ប្រឆាំងនឹងអ្នកទាំងនោះតែម្ដង៕